AlbanianSport.com 20.05.2015 12:00
ASNN – Mesfushori katalanas Ksavi Hernandez do ta zyrtarizojë largimin nga Barcelona të enjten, ndërsa po përgatitet të lëviz drejt Katarit, në ekipin Al-Sad. 35 vjeçari e kaloi tërë karrierën tek gjigandja katalanas dhe fitoi 23 trofe nga ajo kohë, por ka vendosur të largohet pasi e kaloi pjesën më të madhe të këtij sezoni në stol.
Ksavi, i cili ishte afër Al-Sad verën e vitit të kaluar, kishte vendosur të qëndronte në ekipin e Luis Enrikes edhe një sezon, ndërsa do të takohet me mediat të enjten, për t’jua shpjeguar vendimin e largimit emocionues nga “Camp Nou”, në ndeshjen e së shtunës ndaj Deportivo La Korunjës.
Fituesi i Botërorit, i përshkruar nga presidenti i Barcelonës, Hosep Maria Bartomeu, si mesfushori më i madh në histori, mund t’ia shtojë vitrinës së tij edhe dy trofe, pasi Barcelona do të luajë kundër Atletikos së Bilbaos, në finalen e Kupës së Mbretit (“Copa del Rey”) në fund të këtij muaji dhe ndaj Juventusit në finale të Ligës së Kampioneve më 6 qershor.
Në të vërtetë mbeten shumë hije dyshimi mbi lëvizjen e mesfushorit katalan, megjithëse më herët media spanjolle ka shkruar për një lëvizje të tij drejt Katarit, ose në kampionatin amerikan të futbollit, MLS. Mbetet të shihet në ditët në vijim se si do të reagojë mesfushori veteran i Barcelonës, pasi nuk përjashtohet mundësia që klubi të rinovojë me të edhe për një vit.