ASNN – I pyetur nga faqja sportive vendase në Internet, “azerispor.com”, nëse ai do të vazhdonte të ishte pjesë e Karabakut edhe sezonin e ardhshëm, 32-vjeçari Agolli tha: “Sinqerisht, nuk jam duke u menduar për këtë. Të gjitha mendimet e mia janë të fokusuara në lidhje me ndeshjen e ardhshme. Sigurisht, te Karabaku unë jam i lumtur me gjithçka.” Për mbrojtësin kuqezi, ky është sezoni i pestë që luan në Azerbajxhan, nga sezoni 2010-2011, ku edhe ka fituar një titull, ndërkohë që është në pritje të trofeut të dytë.

Pak kohë më parë, lojtari i Kombëtares shqiptare ka thënë për mediat shqiptare, se ai do të dëshironte ta mbyllte karrierën e tij te Tirana, skuadra edhe ku është formuar e rritur si futbollist. Një gjë të tillë e bëri edhe mesfushori Ervin Bulku, i cili pas eksperiencave në Kroaci, Ukrainë, Azerbajxhan dhe Iran, tani po luan me Tiranën. Mbetet të shihet në javët e ardhshme se si do të operojë mbrojtësi Ansi Agolli, pra nëse do të vijojë të qëndrojë në radhët e Karabakut në kampionatin e Azerbajxhanit, apo do të zgjedhë të luajë me një skuadër tjetër, ku Tirana është opsioni i parë.

Fakt është se Agolli luan në nivele të larta dhe në Kombëtare ka qenë zgjedhje e parë dhe e padiskutueshme e trajnerit Xhovani de Biazi në ndeshjet e këtij edicioni. Dhe besimin tij mbrojtësi e ka justifikuar, pasi në krahun e majtë të repartit difensiv Agolli është si një mur i pakalueshëm, vërtetuar nga paraqitja e tij fantastike në të gjitha takimet. Ajo që duhet theksuar është se, gjatë marsit, Agolli pati pohuar në Baku për AlbanianSport.com se ishte i interesuar të luante për të paktën edhe një sezon tjetër për skuadrën e Karabakut dhe më pas do të shqyrtonte të ardhmen e tij.