ASNN – “Në këtë fund kampionati përballja derbi vjen ndryshe nga të 3 takimet e tjera duke parë edhe objektivat e të dyja ekipeve, – ka deklaruar kapiteni i Partizanit, Nderim Nexhipi, duke folur në konferencën e përditshme për shtyp për përballjen me Tiranën. – Sigurisht nuk na intereson ambicia e Tiranës, por ne shohim vetëm objektivin tonë.”
“Synimi ynë në këtë takim është sigurisht marrja e maksimumit dhe një fitore do na e bënte akoma më të prekshëm objektivin “Evropë”, – ka vijuar ai. – Në një derbi pranohen të 3 rezultatet, por u premtoj tifozëve që do japim shpirtin në fushën e lojës për ta fituar këtë përballje.”
“Dëshira është që edhe në këtë derbi të arrij të shënoj, por sigurisht më me rëndësi është marrja e tre pikëve, – ka theksuar futbollisti shqiptar nga Maqedonia. – Përkundër thashethemeve të përhapura kohët e fundit nga rrjetet sociale për një tolerim të mundshëm nga ana jonë, ju premtojmë që kjo ndeshje do luhet ndershmërisht dhe do japim maksimumin në këtë takim.”
“Në këtë përballje, e pres stadiumin flak të kuq”, – ka përfunduar kapiteni i Partizanit, Nderim Nexhipi.