ASNN – Në një sfidë plot emocione, ku kuqeblutë kanë fituar përballë Kamza Basket me rezultatin 81-69, Vllaznia është kualifikuar për në finale të Kampionatit Kombëtar të Basketbollit për Meshkuj, pasi e ka fituar duelin gjysmëfinale me rezultatin e përgjithshëm 2-1. Vllaznia ka qenë gjatë gjithë lojës në epërsi, ndërsa Kamza nuk e mori asnjëherë epërsinë dhe 19-18 do të mbyllet pjesa e parë në favor të vendasve.
Gjatë pjesës së dytë, Vllaznia shpërthen 23-17 duke mbyllur 42-35 gjysmën e parë. Kamza Basket e ka të vështirë sepse dëmtohen Daliu edhe Muhametaj, pas një përplasjeje me amerikanin Hog. Lojtarët e stolit nuk arrijnë ta nxjerrin Kamzën nga situata, ndërsa Vllaznia nuk gabon dhe është gjithnjë e saktë, qoftë në sulmet e saj e po ashtu edhe në lojën mbrojtëse.
23-21 mbyllet pjesa e tretë dhe 16-13 pjesa e katërt dhe krejt takimi 81-69. Pas fitores së parë nga Vllaznia dhe fitores në ndeshjen e dytë nga Kamza, fitorja e tretë i buzëqesh Vllaznisë, e cila kualifikohet në finale. Tifozëria e Vllaznisë në këtë përballje rezultoi e papërmbajtshme, duke ofruar një atmosferë tejet e ndezur dhe një dekor brohoritjesh që nuk kishte ndodhur më parë në të tilla masa.
Vllaznia – Kamza Basket 81-69 (2-1)
(19-18, 23-17, 23-21, 16-13)
Vllaznia: Shaqiri (5), Llazani (9), Hog (21), Gavraniç (20), Buker (6). U aktivizuan: Bekteshi (3), Ndoja (4), Arra, Huti (2), Faslija (11), Shabani. Trajner: B. Gjeçaj
Kamza Basket: Muhametaj (3), Shestani (14), Daliu (2), Karaj (26), Hamati (12). U aktivizuan: Ndreko (4), Qehajaj (2), Birçej (4), Gjoka. Trajner: A. Muhametaj
Gjyqtarë: E. Koçi, E. Hoxha, G. Hoxha
