ASNN – Kampionati Kombëtar i Basketbollit për Femra ka nisur të shtunën fazën e “play-off”-it me ndeshjet e para të gjysmëfinaleve dhe, ndërkohë që Apolonia ka fituar bindshëm në përballjen me Skënderbeun, Tirana ka bërë surprizën, duke fituar ndeshjen e parë në Vlorë ndaj Flamurtarit vendas. Ndeshjet e dyta luhen të mërkurën, më 8 prill 2015.

Pas mbylljes së sezonit të rregullt, Kampionati Kombëtar i Basketbollit për Femra vazhdon me fazën e “play-off”-it, me ndeshjet e para të gjysmëfinaleve, të cilat janë luajtur të shtunën. Ndërkohë që Apolonia ka fituar bindshëm në përballjen me Skënderbeun, Tirana ka bërë surprizën, duke fituar ndeshjen e parë në Vlorë ndaj Flamurtarit vendas.

Në këtë takim, vendaset e kanë nisur më mirë pjesën e parë, duke kryesuar vazhdimisht dhe duke e mbyllur këtë 10-minutësh në epërsi 22-13. Tirana ka reaguar në 10-minutëshin e dytë, të cilin e fiton me shifrat 15-11, por janë vlonjatet e Viron Toskës që shkojnë në pushim të ndeshjes me epërsinë 33-28. Fatin e këtij takimi do ta vendosë 10-minutëshi i 3-të.

Gjatë kësaj pjese është shënuar 1/3 e gjithë totalit të pikëve dhe Tirana ka fituar me rezultatin 33-24, duke përmbysur kështu shifrat në 61-57. Vajzat bardheblu të drejtuara nga trajneri Erdal Borova nuk e kanë lëshuar lojën, duke e fituar edhe pjesën e 4-t dhe të fundit, me shifrat 19-17 dhe gjithë ndeshjen me rezultatin 80-74.

Tirana hedh kështu një hap të madh drejt vendit në finale, ndërsa ndeshjet e dyta të gjysmëfinaleve luhen të mërkurën, më 8 prill 2015.

Kampionati Kombëtar

i Basketbollit – Femra

Kalendari i “Play-Off”-it

Gjysmëfinalet

Ndeshjet e para

(4 prill 2015)

Apolonia – Skënderbeu      90-50              (1-0)

Flamurtari – Tirana               74-80              (0-1)

Ndeshjet e dyta

(8 prill 2015)

Skënderbeu – Apolonia      (16:00)

Tirana – Flamurtari               (19:00)

Ndeshjet e treta*

(11 prill 2015)

Apolonia – Skënderbeu      (16:00)

Flamurtari – Tirana               (11:00)

* Nëse do të jenë të nevojshme.