ASNN – Federata Shqiptare e Shahut e ka mbyllur me sukses Kampionatin Kombëtar të grupmoshave të Nën-12, Nën-16 dhe Nën-20 vjeçarëve.
Në përfundim të eliminatoreve, 17-vjeçari Timoleo Miço i Apolonisë u shpall “kampion kombëtar” për Nën-20-vjeçarët, Tedi Shpati i Akademisë për Nën-16-vjeçarët dhe shahisti Pirro Marko po i Akademisë, zuri vendin e parë për grupmoshën Nën-12-vjeç.
Sipas Federatës, përveç kampionëve të vitit, kjo garë në të cilën morën pjesë 43 shahistë dhe shahiste, nga Malësia e Madhe e deri në Sarandë, në përgjithësi evidentoi progres në nivelin e lojës të mjaft lojtarëve të tjerë.
Disa prej tyre që bënë diferencën mes bashkëmoshatarëve ishin Erisa Isufi (Teuta), Erdjon Vito (Tomori), Zino Veleshnja (Tomori), Devid Spiru (Akademia), por edhe Xhulio Shkurta dhe Bruna Tuzi për Nën-20-vjeçarët.
Gjithashtu, sipas federatës, edhe shahistja e talentuar Klean Shuqja (Akademia) bëri një garë shumë të mirë.
