“Nëse nuk mundni Armeninë, më mirë mos hajdeni më në Baku”. Ky ka qenë kërcënimi i drejtuesve të skuadrës azerbajxhanase Karabag për mesfushorin e majtë të kombëtares kuqezi, Ansi Agollin. Dhe pas fitores të së dielës, teksa tanët kanë mundur në Elbasan me përmbysje, 2-1, Armeninë, Agolli është pritur si hero në Baku. Ishte paralajmëruar dhe ashtu ndodhi.
Lojtari i kombëtares shqiptare, Ansi Agolli, është pritur në mënyrë madhështore në Karabak. Klubi azer, në rast fitoreje ndaj armenëve, i kishte premtuar një dhuratë të veçantë, si atij, ashtu edhe shqiptarit tjetër, Admir Teli, pavarësisht se ky i fundit ka kohë që nuk është pjesë e kuqezinjve, edhe pse është i qëndrueshëm në formacionin e Karabagut.
Megjithatë, dhuratën më të bukur Agolli e ka marrë nga trajneri i vet, Kurban Kurbanov, i cili i dhuroi një orë “Rolex”. Jo vetëm kaq, por trajneri e ka përqafuar Agollin 4 herë, gjë që nuk e ka bërë kurrë më parë me këtë lojtar. Ansi konsiderohet si lojtari i huaj më i mirë që ka luajtur në radhët e Karabakut, duke u shpallur dy herë radhazi, vjet dhe sivjet, kampion i Azerbajxhanit, si dhe duke i kualifikuar deri në fazën e ndeshjeve në grupe në Ligën e Evropës.
Edhe vlerësimi e pritja e tifozerisë azere ka qenë e jashtëzakonshme, pasi të gjithë dëshironin një fitore kundër Armenisë së “urryer”, vetë Agolli ka rrëfyer: “Jam i emocionuar dhe shumë i lumtur. Kemi ngritur peshë zemrat e gjithë shqiptarëve, por edhe azerëve.” Në fakt, Azerbajxhani dhe Armenia kanë kohë që janë në konflikt me njëri-tjetrin.
Dhe arsyeja është rajoni i Nagorni-Karabakut, i cili pretendohet nga të dy shtetet, e jo vetëm kaq, por kërkon të jetë dhe si republikë autonome. Për rrjedhojë të kësaj përplasjeje politike, Armenia dhe Azerbajxhani asnjëherë nuk janë kundërshtar në fushatat eliminatore, si nëpër Botërorë, ashtu edhe nëpër Evropianë. Është si Spanja me Gjibraltarin, apo dhe si Ukraina me Rusinë.
E siç po pretendohet dhe për ne e Serbinë. Dhe për këtë qëllim, azerbajxhanasit janë kënaqur me fitoren tonë dhe e kanë pritur Agollin si hero.
