ASNN – Shqipëria shkon në ndeshjen e të dielës me Armeninë për fitore, por për trajnerin Xhovani De Biazi, kjo ndeshje nuk e përcakton fatin e këtyre eliminatoreve. Ndeshja Shqipëri-Armeni luhet të dielën, duke nisur nga 18:00 në Elbasan “Arena” dhe do të sillet për sportdashësit drejtpërdrejt nga Rrjeti i Radio-Televizionit Shqiptar.
Në prag të ndeshjes me Armeninë, trajneri i Kombëtares, Xhovani De Biazi, ka dalë të hënën në një konferencë për shtyp, duke shpalosur listën e 28 lojtarëve të cilëve ai u ka besuar për këtë sfidë. I pyetur nga Televizioni Shqiptar, De Biazi ka theksuar se kjo ndeshje nuk e përcakton fatin e këtyre eliminatoreve.
“Është e vërtetë që është një ndeshje e rëndësishme, mbase më e rëndësishmja e këtyre eliminatoreve, por ne do të përqendrohemi vetëm tek kjo sfidë, pa menduar për pasojat e rezultatit të saj në vijimësinë tonë, – ka deklaruar ai. – E para vjen ndeshja, ndërsa ëndrra jonë e madhe për kualifikim është shumë më e madhe sesa një ndeshje e vetme.”
De Biazi ka shprehur solidaritet me homogun e tij, trajnerin e përfaqësueses së Armenisë, Bernard Shalondë, të cilit i është dhënë ultimatum për ta fituar sfidën me kuqezinjtë ose për t’u përballur me shkarkimin. “Mua më vjen keq si një koleg për kolegun, që trajnerit të Armenisë i është dhënë një ultimatum i tillë”, – ka thënë italiani.
“Kjo sepse ai ka bërë një punë të jashtëzakonshme me këtë skuadër, e cila mund të thuhet se ka qenë e pafat në këto ndeshje të para të Eliminatoreve, – ka vijuar trajneri i Kombëtares, Xhovani De Biazi. – Përtej kësaj keqardhjeje, unë dua të theksoj që shkojmë në këtë ndeshje për ta fituar atë.”
