ASNN – Domosdova ka zhgënjyer në ndeshjen e parë të kampionatit, të cilën e ka luajtur në Shijak përballë Erzenit vendës, ndërsa humbi 2-4. Duket se diçka nuk funksionoi siç duhet në ekipin e trajnerit Rira. Domosdova bëri një merkato të mirë, por në ndeshjen e parë nuk dha rezultat, edhe pse arritën të shënonin dy herë. Trajneri Rira është shprehur se ata duan kohë të ambientohen me ekipin pasi kanë shumë pak ditë që i janë bashkuar kësaj skuadre.

“Kjo ishte një ndeshje për t’u harruar për ta pasi tashmë kanë nevojë të përmirësohen si moralisht, ashtu edhe taktikisht për të mos humbur pikë në ndeshjet e radhës dhe pse jo të marrin pikë të plota, – ka deklaruar trajneri prrenjak. – Skuadrës i ka munguar filozofia e të ndërtuarit aksione model nga të cilat të përfitonte edhe shënimin e golave. Ndeshjet në fushë të huaj janë të vështira për t’u fituar, por kjo nuk justifikon faktin e pësimit të katër golave.”

“Kjo pasi në këtë rast mund të themi që diçka nuk shkon në mbrojtjen e ekipit, – ka vijuar ai. – Edhe pse humbën, lojtarët besojnë tek kthesa në ndeshjen e radhës e do të jenë më të qartë e më efikasë. Gabuam në ndeshjen e parë e tani do të punojmë shumë fort për të marrë maksimumin nga ndeshjet e radhës. Dëshira e lojtarëve për të fituar është e madhe dhe ata nuk do të pranojnë më humbje. Tashmë detyra jonë është të stërvitemi intensivisht dhe të krijojmë ekip të qëndrueshëm dhe të japim më të mirën, pasi kemi komponentë mjaft të mirë në skuadër.”