ASNN – Futbollistët më të mirë të të gjitha kohërave vlerësohen sipas shumë treguesve dhe e vërteta është se asnjëherë studiuesit, tifozët, analistët, optimistët dhe skeptikët, nuk merren vesh për më të mirin, jo vetëm për shkak të preferencave personale, por edhe se në kohë të ndryshme futbolli shfaq cilësi të ndryshme dhe natyrisht shpejtësi të ndryshme. E thënë ndryshe, duke bërë një gjykim të caktuar për një futbollist që luan aktualisht në fushë, nuk mund të jesh kaq i përpiktë për të bërë gjykimin e një futbollisti që ka luajtur para 70 apo 80 vjetësh.
“AlbanianSport.com” ka sjell në vëmendjen e lexuesve gjatë 10-ditëshit të dytë të shkurtit disa prej emrave më të mëdhenj të futbollit të kombit shqiptar. E dimë, lexuesit mund të mos kënaqen me këtë radhitje, aq më pak njerëzit që kanë luajtur vetë futboll dhe mund të kenë preferenca të ndryshme, madje ne as nuk pretendojmë të jemi vlerësuesit më të mirë, por do të përpiqemi të krijojmë një ndarje për efekt radhitjeje, sepse secili prej tyre e shumë të tjerë jashtë listës e meritojnë të jenë të pranishëm këtu.
Ali Mema ka qenë ndër 11 të përzgjedhurit tanë dhe ne po jua risjellim edhe një herë profilin e tij, pas ndarjes së tij nga jeta të martën.
Ali Mema – Klasi i tij është ende i paarritshëm
Ali Mema u lindi në Tiranë më 1 shkurt të vitit 1943 dhe u nda nga jeta më 26 mars 2019. Nëse Tirana ka mundur të rivalizojë me Partizanin në kulmin e viteve të të kuqve, është meritë e një grupi lojtarësh që kanë shkruar histori. Dhe Tirana e vitit 1964 ka shkruar histori. Në këtë histori ka një emër që bën diferencë, ai është Ali Mema, një nga emrat e shquar të kësaj familjeje që ka nxjerrë shumë futbollistë.
Përfshirja në listë e Ali Memës është një nderim edhe për ata figura të shquar të futbollit shqiptar që rritën cilësinë e kampionatit dhe u ballafaquan me shumë dinjitet ndaj Gjermanisë (barazuan 0-0) në ndeshjen e shekullit në vitin 1967. Ka një karrierë mjaft të spikatur dhe pa frikë mund të thuhet se Ali Mema ka qenë mesfushori me tipare sulmuese më i miri që ka pasur ndonjëherë Shqipëria.
Lojtar me cilësi të larta teknike, që luajti me “17 Nëntorin” kryesisht, por në karrierën e tij i 12-vjeçare si profeisonist, Mema ka luajtur në Shkodër 2 vite me Vllazninë, si dhe një edicion me Partizanin. Me skuadrën përfaqësuese ka luajtur 14 ndeshje, shifër e lartë për kohën, sepse në atë periudhë kishte shumë pak ballafaqime ndërkombëtare. Sa ishte Ali Mema në fushë, “17 Nëntori” i atyre viteve shkëlqente.
Nëse do të kishte jetuar në vend tjetër dhe në kohë tjetër, Ali Mema mund të ishte një futbollist shumë i madh.
